ಜಯಿಸೋಣ

ನಾಲ್ಕು ದಿನದಿ ಸಾಕೆನಿಸದಿರಲಿ ಬದುಕು

ಒಲವೆಂಬುದು ಜೊತೆಯಾಗಿರಲಿ ಬೆಳಕು

ಆದರಣೀಯತೆಯ ಸೂರಾಗಲಿ ಮನವು

ಸಾಧಾರಣದಲೂ ಶ್ರೀಮಂತಿಕೆಯ ಹೃದಯವು//

ಕೊಟ್ಟಿದ್ದು ಮಾತ್ರವೇ ಗಿಟ್ಟಿಸುವುದು ಹೆಸರನ್ನ

ಬಚ್ಚಿಟ್ಟು ಸಾಧಿತವಾಗುವುದು ಏನನ್ನು?

ಕೊಡು ಕೊಳ್ಳುವಿಕೆಯ ಸೂತ್ರದಲ್ಲಿ

ಬಿಡಿಸಲಾಗದ ಬಾಂಧವ್ಯವು ಬೆಳೆವುದಲ್ಲಿ//

ನಲುಮೆಯ ನುಡಿಯೊಳು ಗೆಲ್ಲು

ಚಿಲುಮೆಯಂತಾಗಿರಲಿ ಸೊಲ್ಲು

ಅರಿತರಿತು ಮತ್ತೆ ಅರಿಯಾಗದಿರಿ

ಮರೆತಾದರೊಮ್ಮೆ ಮನವ ಸಂಧಿಸಿರಿ//

ಸಂತಸವ ಹೆಚ್ಚಿಸಿ ಸಂಭ್ರಮದಲಿ

ಚಿಂತೆಯನೆ ಕಳೆವ ಸಂತೈಸಿಕೆಯಲಿ

ಹೊತ್ತೊಯ್ಯುವೆಯೇನ ಅಂತಿಮ ಯಾತ್ರೆಯಲಿ

ಬಿತ್ತಿ ಹೋಗೋಣ ಮೆಚ್ಚುಗೆ ಅಚ್ಚಳಿಯದಲಿ//

ಅಳಿಯದ ಜೀವಜಲಕಿಲ್ಲ ದ್ವೇಷ

ಸುಳಿಯುವ ಪ್ರಾಣದನಿಲಕಿಲ್ಲ ರೋಷ

ಬೆಳಗುವ ದಿನಕರನಿಗಿಲ್ಲ ಅನ್ಯ ರೀತಿ

ಅಳಿವ ಬಡ ಜೀವಕೇಕೆ ಅಹಂ ಭ್ರಾಂತಿ //

ಮುಗಿದು ಹೋಗುವ ಬದುಕ ದಾರಿಯ

ಸೊಗಸಾಗಿಸುವುದು ಸಹಬಾಳ್ವೆ ಹೆಜ್ಜೆಯು

ಹಗುರಾಗಿ ತಿಳಿಯದೆ ಎಲ್ಲರೊಳು ಬೆರೆಯುತ

ನಗುಮೊಗದಿ ಜಯಿಸೋಣ ಮನುಜ ಮತ//

ಭವಾನಿ ಗೌಡ (ಭುವಿ)

ವಿಜಯಪುರ